Aramaioko guraso elkarteak antolatuta 50 bat lagun ari dira irristaketa saioetan parte hartzen. Bergarako Burdinola irristaketa elkarteko Agustin Oianguren eta Maiuri Lasagaren gidaritzapean askotariko ariketak egin dituzte gaur goizean ere adin askotariko aramaioarrek.
Aurreko domekan egin zuten txanda honetako lehen saioa, eta gaur izan da bigarrena. 10:30erako gerturatu dira lehen aramaioarrak udal pilotalekura eta patinak janztearekin batera hasi dira askotariko ariketak egiten. “Jolasak proposatzen dizkiegu, jolasean hasten zarenean ahaztu egiten duzulako patinak dituzula eta azkarrago ikasten da”, azaldu du Oinagurenek.
Adina ez da aitzakia. Oinagurenek onartzen du txikitan azkarrago ikasten dela oreka kontuak tarteko, baina ez dago ezinezkorik. “Ume txiki batek 30 minutu nahikoa izaten ditu patinetan ikasteko, baina helduek ere ikas dezakete. Nik 45 urterekin hasi nintzen, eta ordutik ez dut besterik ikusten. Lasterketak ere egin ditut”, esan du.
